Рөстәм Миңнеханов эшкуарлар белән Covid-19 шартларында ярдәм хакында фикер алышачак

Татарстан Президенты республика Сәүдә-сәнәгать палатасында эшкуарлар белән очраша.

(Казан, 16 ноябрь, «Татар-информ»). Бүген Татарстан Президенты Рөстәм Миңнеханов республиканың эшлекле бергәлеге вәкилләре белән очрашу үткәрәчәк. Очрашуда коронавирус инфекциясе таралу шартларында бизнеска ярдәм күрсәтү чаралары хакында фикер алышырга ниятлиләр. Бу хакта ТР Президентының матбугат хезмәте хәбәр итә.

Шулай ук сорау-җавап форматында бизнес алып баруның төрле тармаклары һәм өлкәләрендәге эшкуарлардан конкрет тәкъдимнәр тыңланачак.

Очрашуда хакимият, хокук саклау органнары, гаммәви мәгълүмат чаралары вәкилләре дә катнашыр дип көтелә. ТР бизнес-омбудсмены Фәрит Габделганиев очрашуның модераторы булачак.