Владимир Путин Өлешчеләр хокукын яклау фондына 30 млрд сум өстәргә кушты

Россия Президенты төзелеш тармагын үстерү мәсьәләләре буенча видеоконференция режимында киңәшмә үткәрде.

(Казан, 16 апрель, «Татар-информ»). Россия Президенты Владимир Путин, ил төбәкләрендәге проблемалы йортларны төзеп бетерү өчен, Өлешчеләр хокукын яклау фондына өстәмә рәвештә 30 млрд сум акча бүлеп бирергә кушты. Бу хакта дәүләт башлыгы төзелеш тармагын үстерү мәсьәләләре буенча киңәшмәдә хәбәр итте.

«Күп кенә төбәкләрдә алданган өлешчеләр дип аталган гражданнар проблемасы әлегә кадәр хәл ителмәгән. Өлешчеләр хокукын яклау фондын 30 млрд сумга капиталлаштырырга һәм бу ресурсларны узган елларда җыелган проблемаларны хәл итүгә юнәлдерергә тәкъдим итәм», — диде ул.

Төзелеп бетмәгән йортларны төзеп бетерергә һәм шуның белән төзелеш индустриясен тәэмин итү генә түгел, ә иң мөһиме — кешеләргә ярдәм итү. Меңләгән гаилә көткән торакларын тизрәк ала алсын өчен, дип бурыч куйды дәүләт башлыгы.