Туристлык кешбэгының дүртенче этабы 16 июньнән башлана

Туристлар өчен кешбэкка дүртенче этап вакытында 2 млрд сумга кадәр акча таләп ителергә мөмкин, ди Ростуризм җитәкчесе.

(Казан, 11 июнь, «Татар-информ»). Акчаны өлешчә кире кайтару юлы белән Россия буйлап турны 16 июньнән сатып алырга мөмкин. Бу хакта РИА Новости Ростуризм башлыгы Зарина Догузовага сылтама белән хәбәр итә.

«Безнең агымдагы сатулар 15 июньдә тәмамлана, 16 июньдә без чираттагы этапка күчәбез, һәм турларны көзгә, 1 октябрьдән декабрь уртасына кадәр сатып алырга мөмкин булачак», — дип аңлатты ул.

Ростуризм җитәкчесе сүзләренчә, туристлар өчен кешбэкка дүртенче этап вакытында 2 млрд сумга кадәр акча таләп ителергә мөмкин. Яңа этап «түбән» сезонга ярдәм итүгә басым ясар дип планлаштырыла.

Март ахырында Россия Президенты Владимир Путин мәктәп укучылары һәм студентлар өчен ел буена кешбэк кертергә тәкъдим итте.