Ай башы белән чагыштырганда, Казанда мотор ягулыгы бәясе 3,6-7,7 процентка күтәрелде

Артуына карамастан, Казандагы дизель ягулыгы Идел буенда иң арзанлысы булып кала
(Казан, 11 июнь, “Татар-информ”). 8 июньгә булган мәгълүматларга караганда, Идел буе федераль округына кергән төбәкләр башкалаларынның барысында да мотор ягулыгы бәяләре күтәрелде. Казанда, мәсәлән, ай башы белән чагыштырганда А-76 лы бензинның уртача бәясе 3,6 процентка, АИ-92,93 лесе-7,7, АИ-95 маркалы бензин - 4,6 процентка, дизель ягулыгы – 5,1 процентка кыйммәтләнгән.

Регуляр маркалы АИ-92 ле бензинның бүген иң кыйммәтлесе Уфада сатыла. Биредә аның 1 литры уртача 19 сум 17 тиен тора. Иң кыйммәтле АИ-95 ле бензин да Уфада (литры 20 сум 75 тиен). А-76 лы бензинга иң югары бәяне (16 сум 44 тиен) Йошкар-Олада сорыйлар. Литры 19 сум торган кыйммәтле дизель ягулыгы – Уфа белән Саранскида. Артуына карамастан, литры уртача 16 сум 33 тиен торган Казандагы дизель ягулыгы Идел буенда иң арзанлысы булып кала. Бу хакта Татарстанстат хәбәр итә.