Чирмешән районы Түбән Кәминкә җирлегендә үзсалым акчасына эшләр планлаштырылган

Җирлектә узган референдум вакытында балигъ булган һәр кешедән 550 сум күләмендә үзсалым җыярга килешенгән.

(Чирмешән, 9 март, "Татар-информ", "Безнең Чирмешән", Кадрия Гамирова). Түбән Кәминкә авыл җирлегендә үзсалым акчаларының 86 проценты, ягъни 269 мең сумнан артыгы җыелган. Республикадан биреләчәк ярдәмне дә исәпкә алып, бу акчаларга нинди эшләр башкаруны планлаштырганнар. Бу турыда район басмасы хәбәр итә.

Җирлектә узган референдум вакытында балигъ булган һәр кешедән 550 сум күләмендә үзсалым җыярга килешенгән. 

"1 апрельгә кадәр җыелган салымга дәүләт ярдәме елның беренче яртысында кайтачак. Без иң элек аны кыш айларында урам юлларын кардан чистартуга, тракторны карап торуга тотачакбыз", - ди Түбән Кәминкә авыл җирлеге башлыгы Рәдиф Халиков.

Шулай ук Түбән Кәминкә һәм Кара Чишмә авылларындагы су башняларын буяуга, янгын куркынычсызлыгы җиһазлары (гидрант, шланг) сатып алуга һәм Түбән Кәминкә авылында суүткәречләрне яңарту өчен проект ясауга кулланырга планлаштырыла.