Төрек компанияләре Татарстанда үз продукцияләре өчен дистрибьютерлар эзли

ТР Сәнәгать һәм сәүдә министрлыгында Төркия эшмәкәрләре делегациясе белән очрашуда шул хакта сүз булды
(Казан, 7 октябрь, “Татар-информ”). Бүген ТР Сәнәгать һәм сәүдә министрлыгында Төркия эшмәкәрләре делегациясе белән очрашу узды. Төрле компанияләрне тәкъдим иткән бизнесменнар сәфәр барышында Татарстанда үз продукцияләре өчен дистрибьютерлар эзләү, биредә җитештерү куәтләре төзү мөмкинлекләрен өйрәнүне максат итә. Автобус һәм машина төзелеше җиһазларын җитештереп сатучы “Temsa Global” предприятиесе, мәсәлән,Татарстанда продукциясен сату челтәрен эзли. Текстиль, химия, азык, машина төзелеше кебек Төркия икътисадының төрле өлкәләрендә эшләүче “Garipoglu Corporate Group” компаниясе безнең республикада үз продукциясен, аерым алганда, текстиль сату буенча каналлар төзергә ниятли. Төркияең мебель җитештерүче эре компанияләренең берсе булган “Сilek Mobilya” да Татарстанда дистрибьютерлык җелтәрен җайга салырга уйлый. Мебель өчен фурнитура һәм тукыма җитештерүгә инвестицияләр салу мөмкинлеген дә карый.

Очрашуда ТР сәнәгать һәм сәүдә министры урынбасары Линар Латыйпов кунакларга, үз чиратында, Татарстанның сәнәгый һәм инвестиция мөмкинлекләрен презентацияләде, дип хәбәр итә министрлыкның матбугат хезмәте.