Путин газга бәяләр арту аркасында Европаның борчылу сәбәбен атады

Бүген Европада газга бәяләр тарихи максимумны яңадан яңартты, кубометр өчен 1,9 мең доллардан артып китте.

(Казан, 6 октябрь, «Татар-информ»). Газга бәяләр арту аркасында Европа базарларында барлыкка килгән буталчык әлеге проблемага җитди мөнәсәбәт булмау белән бәйле. Бу хакта Министрлар Кабинеты белән киңәшмәдә Россия Президенты Владимир Путин сөйләде. 

«Европада ниләр булганын күрәсезме. Анда базарларда истерика һәм ниндидер буталчык! Ни өчен? Чөнки моңа җитди карамыйлар. Кемдер климат үзгәрешләре проблемаларында спекуляцияли, кемдер нәрсәнедер бәяләми, кемдер бу тармагына инвестицияләрне киметә башлый», — дип дәүләт башлыгы сүзләрен китерә ТАСС.

Бүген Европада газга бәяләр тарихи максимумны яңадан яңартты, кубометр өчен 1,9 мең доллардан артып китте. Биш ил — Франция, Испания, Чехия, Румыния һәм Греция зәңгәр ягулыкка бәянең арту сәбәпләрен тикшерү кирәклеге турында белдереп, Евросоюзга уртак гариза белән мөрәҗәгать итте.