Казанда АИ-93,92 маркалы бензинның уртача бәясе 13,4 процентка күтәрелде

Башка төр автомобиль ягулыгының да кыйммәтләнүе күзәтелә
(Казан, 5 июнь, “Татар-информ”). Татарстанстат узган атнада Казанда АИ-93,92 ле бензинның уртача бәясе 13,4 процентка күтәрелүе турында хәбәр итә. 1 июньгә булган мәгълүматларга караганда, А-76 лы бензин - 4,6 процентка, АИ-95 лесе -3,7, дизель ягулыгы – якынча 2 процентка кыйммәтләнгән.

Шушы үзгәрешләр нәтиҗәсендә, Казан Идел буенда иң арзанлы АИ-95, АИ- 93,92 ле бензин сатыла торган төбәк булудан туктады. Соңгы бер атна мәгълүматларына караганда, литры уртача 16 сум 61 тиен торган иң очсызлы АИ-93,92 ле бензин Ульяновскида, литры 18 сум 59 тиен торган АИ-95 маркалы ягулык – Самарада сатыла. Арзанлы А-76 лы бензин да (13 сум 74 тиен) Самарада. Казанда исә хәзер дизель ягулыгы гына иң арзанлы булып кала (15 сум 54 тиен).