Россиядә киләсе елда "больничный" һәм декрет акчасы артачак

2018 елда иң югары декрет акчасының айлык күләме 61 мең 375 сум тәшкил итәчәк. Бу – 2017 елга караганда 3 мең 542 сумга артыграк.

(Казан, 3 ноябрь, «Татар-информ»). Россиядә киләсе елда больничный һәм декрет акчаларын арттырырга ниятлиләр, дип яза «Российская газета» РФ Хезмәт һәм социаль яклау министрлыгына сылтама белән.

Әйтик, 2018 елда иң югары декрет акчасының айлык күләме 61 мең 375 сумны тәшкил итәчәк. Бу – 2017 елга караганда 3 мең 542 сумга артыграк. Айлык иң югары больничный исә 61 мең 375 сумны тәшкил итәчәк.

Министрлыкта искәртүләренчә, иң югары суммадагы түләүләрне алу өчен, 2017 елда рәсми хезмәт хакының күләме – 755 мең (аена уртача 63 мең сумга якын), ә 2016 елда 718 мең (аена уртача 60 мең сум тирәсе) сумнан да кимрәк булмавы шарт.