Казанның җәмәгать транспортына пассажирлар агымын исәпләп бару җайланмаларын урнаштыра башладылар

 (Казан, 19 май, «Татар-информ», Ирина Игнатьева). Бүген Казанның җәмәгать транспортына пассажирлар агымын исәпләп бару җайланмаларын урнаштыра башладылар. Беренче техник яңалыклар 1 нче маршрут троллейбусларында барлыкка килә.

Бу хакта “Татар-информ” МА хәбәрчесенә “Метроэлектротранс” МУП генераль директорының эксплуатацияләү буенча урынбасары Рим Сафиуллин хәбәр итте.

Техник җайланмалар бүген 1нче маршруттагы теге яки бу троллейбусның күпме пассажир йөрткәнлеген билгеләячәк.

Димитровградның бер заводында җитештерелгән җайланмалар шәһәрдә күпме пассажир йөртелүе турында объектив мәгълүмат бирәчәк. Моңа бәйле рәвештә, алынган табышны да төгәл белеп булачак.

Якынча бер айдан пассажирлар агымын исәпләп бару җайланмаларын Казанның 5 нче маршрут трамвайларына урнаштыра башлыйлар.