Заман һәм без//ХАКЫЙКАТЬ ТУГАН ҖИРЕБЕЗДӘ//3 июнь, №21

Заман һәм без//ХАКЫЙКАТЬ ТУГАН ҖИРЕБЕЗДӘ//3 июнь, №21
(Ахыры. Башы газетаның 1 нче биттә). Узган гасыр башында тарих татар халкына бәхетле тормыш төзү форсаты бирде. Мәсәлән, финнар, по­ляклар бу форсаттан файдаланды. Беркатлы татар халкы­ның зыялылары, әйдәп баручы асыл уллары исә Ленин һәм аның тирәсендәгеләрнең демагогиясенә ышанды һәм... һәлак булды. Беренчеләрдән булып Мирсәет Солтангалиев юк ител­де...

Мәрхүм әбием Баһаветдин кызы Миңлехәләс революциягә кадәр бик рәхәт яшәдек, дип сөйли иде. Авылда берничә кибет эшләвен, аларда теләгән һәрнәрсә булуын, хәтта төсле чытыр кәгазьгә төрелгән әфлисуннар сатылуын әбиемнән ишетеп беләм. Саф сулы күлләргә, куе урманнарга бай бул­ган Лашчыбашы. Халкы да, үзенә булгач, тырышып эшләгән, мул тормышта яшәгән. Социалистик пропаганда исә безгә киресен тукыды. Күпләр аңа ышанды, авыл халкының кол­лар хәлендә яшәвен аңламады. Инде күп еллар үткәч кенә әбиләребезнең хаклы булуларын төшендек. Димәк ки, ха­кыйкатьне Мәскәүдән яисә Лондон-Парижлардан эзләргә ки­рәкми. Хакыйкать әби-бабайларыбызның телендә, биредә — туган җиребездә.

Оста телле чит-ятларның барлык уйниятләре — безне алдау, байлыкларыбызны талау, безнең сыртыбызда яшәү... Гасырлар буе сыналган яшәү рәвешен җимереп, авылдаш­ларыбыз 1930 елларда колхоз төзи. Имеш, банклар ба­сып, Кремльгә кереп утырган Сталин Лашчыбашының Әх­мәтләрен, Вәлиләрен кайгырта. Юк шул. Аңа фәкать авыл халкының җелеген суырырга инструмент кирәк була... Нәтиҗәдә, игене, ите, сөте — җитештергән һәрнәрсәсе читкә китеп тора. Үзе исә ач яши. Колхоз рәисе Гайсин Борһан Гайса улы моңа түзми, колхозчыларга бераз икмәк бирә. Шуның өчен коммунистлар аны җәзалап үтерә... Җитәр, балаларча беркатлы булмыйк, читләргә табынмыйк. Туган җиребезне, үз халкыбызны олылыйк. Борһан абый Гайсин кебекләрнең исемнәрен мәңгеләштерик. Авылларыбызны торгызыйк, андый кешеләргә һәйкәлләр куйыйк.

Бүген дә социализм чорын сагынучылар күп. Аларга ияр­мик. Ул елларда безнең ата-аналарыбыз сыртында яшәү­челәр күп иде. Газиз җиребезнең җелеген — нефтен суы­рып, шуны сатып яшәде ул СССР дигән дәүләт.

Өметсез шайтан, ди. Яңа икътисади шартларда яшәргә сәләтсез булуын күрсәткән колхозлар, һичшиксез, бетәр. Халык үз тормышына үзе хуҗа булыр, бәхетле булыр. Без­нең халыкка гына нужа күрү димәгәндер, ул да бәхеткә лаектыр. Дөньяга үз карашыбызны, үзебезнең яшәү рәве­шен, йолаларыбызны кайтарсак, килер ул якты көн.

Фирдүс  Фәтхелислам.