Актаныш районы территориясендә 441 километр озынлыкта оптик җепселле линияләр салынган
Актаныш районы территориясе буенча 441 километр озынлыкта оптик җепселле линияләр салынган. Бу республикада иң югары күрсәткеч. «Актаныш районында цифрлы трансформация үсеше стратегиясе» турында узган район Советы утырышында бу хакта «Таттелеком» акционерлык җәмгыяте филиалы - Чаллы зонасы электр элемтәсе бүлеге җитәкчесе Илдар Нургалиев җиткерде.
Әлеге үтә заманча технология районның барлык торак пунктларын колачлый. Интернет, WI-FI, радиоканаллар, GPON һәм 4G дулкыннар офисларга, аерым биналарга шул оптик-җепселле линия аша тарала. Бу турыда «Актаныш таңнары» сайтында хәбәр ителә.
Актаныш районындагы социаль объектларның зур күпчелеге интернет челтәренә тоташтырылган. Аерым алганда, 66 фельдшер-акушерлык пункты, 38 мәктәп, 3 мәдәният йорты, 24 җирле үзидарә органы, 3 янгын сагы хезмәте урнашкан биналарга интернет кергән.