Чирмешән районы комбайнчысы 1640 тонна бөртек суктырган

Бер гектардан уртача 42 центнер ашлык җыеп алалар.

(Чирмешән, 27 август, “Татар-информ“, “Безнең Чирмешән“, Кадыйр Гомәров). “ЧИРМЕШӘНАГРО” җәмгыяте комбайнчысы Айрат Хөсәенов 2014 елгы “Клаас Тукано-450” комбайнында урак башыннан бирле 457 гектарда эш башкарган, 1640 тонна бөртек суктырган. Бу турыда район басмасы хәбәр итә.

Шул ук хуҗалыктан Сергей Борисов 2017 елгы КЗС-1218 комбайнында 432 гектарда эш башкарган, 1566 тонна бөртек суктырган.

Шундый уңганнар эшләүче “ЧИРМЕШӘНАГРО”да игеннәрнең 55 проценты җыелган да, уңыш та яхшы – гектардан уртача 42 центнер. 400 гектар уҗым бодае да чәчкәннәр.