Мөслим районы Ташлыяр авылында йонсыз сарык бәрәне туган - видео

Бу бәрәнне көлсу шоколад төсендә сарык тудырган.

(Казан, 22 февраль, «Татар-информ»). Мөслим районы Ташлыяр авылында шәхси хуҗалыкта йонсыз сарык бәрәне туган. Бу турыда Мөслим телевидениесе хәбәр итә.

«Гаилә коргач та, әти-әни ике сарык биргән иде, шуннан бирле күпләп үрчетәбез. Шушы көннәрдә бер сарык йонсыз бәрән тудырган. Абзарда йонсыз бәрәнне күреп куркып калдым. Төрле төстәге бәрәннәр булганы бар, шәрә бәрән туганы юк иде әле», — дип сөйли Альбина Салихова.

Бу бәрәнне көлсу шоколад төсендәге сарык тудырган. Бу аның беренче бәрәне икән.

Авыл өлкәннәре дистә еллар элек йонсыз бозау туганын да искәртә.