Әлки районында төлкеләргә 20 мең доза вакцина-кәнфит тараталар

Иттән, балыктан ясалган, җәнлекләр яратып сыйлана торган вакцинаны 2-3 көн эчендә урман, елга буйларында таратып бетерергә уйлыйлар.

(Әлки, 14 май, «Татар-информ», «Әлки хәбәрләре»). Әлки районына кыргый җәнлекләр өчен котыру авыруына каршы 20 мең доза вакцина кайткан. Бу турыда район басмасы хәбәр итә.

Конфет формасындагы әлеге тәмле даруларны ветеринария хезмәткәрләре аучылар, егерьләр белән бергә төлкеләр күп булган урыннарга тараталар.

Мәгълүм булганча, табигатьтә котыру чире белән күбрәк төлкеләр авырый. Бу җәнлекләр инде нигездә балалады.

«Яшь үрчемдә котыруга каршы өстәмә иммунитет барлыкка килсен өчен әлеге тәмле вакцина бик кулай булачак», –ди район ветеринария берләшмәсе җитәкчесе Камил Хәйруллин.

Иттән, балыктан ясалган, җәнлекләр яратып сыйлана торган вакцинаны 2-3 көн эчендә урман, елга буйларында таратып бетерергә уйлыйлар.

Соңгы өч-дүрт елда районда котыру чире очраклары булганы юк. Камил Хәйруллин әйтүенчә, монда һәр елны йорт хайваннарын һәм елга ике мәртәбә кыргый җәнлекләрне чиргә каршы вакциналауның роле бик зур.