Авыл хуҗалыгы министры табыш алмаган хуҗалыкларны тәнкыйтьләде

“Дәүләт ярдәме белән генә ныклы икътисадка ышанып ятып булмый”, – диде министр.

(Казан, 14 февраль, “Татар-информ”, Чулпан Шакирова). Татарстан премьер-министры урынбасары авыл хуҗалыгы тармагында табыш алмаган районнарны тәнкыйтьләде.

“Актаныш, Балтач, Әтнә, Мамадыш, Саба, Кукмара районнары, эре инвесторлардан башка да яхшы гына керем алып эшли. Әгерҗе районы елны зыянга эшләп, табышсыз тәмамлады”, – диде министр.

Ул шулай ук рентабельлеге булмаган Югары Ослан, Кама Тамагы, Әлки, Азнакай, Питрәч районнары авыл хуҗалыгы берләшмәләрен дә тәнкыйтьләде.

“Бу – минем чыгышымның иң хурлангыч өлеше. Без авыл хуҗалыгын дәүләт ярдәменнән башка алып бара алыр идекме икән? Безнең бар керемебез дәүләт ярдәме аркасында гына килеп чыга”, – диде Марат Әхмәтов.