Татарстанда шикәр чөгендере 50 проценттан артык мәйданда җыеп алынган

Уңыш гектарыннан уртача 224 центнер тәшкил итә
(Казан, 13 октябрь, “Татар–информ”, Ирина Игнатьева). Татарстанда шикәр чөгендере 31,6 мең гектар мәйданда җыеп алынган, бу планлаштырган күләмнең 52 процентын тәшкил итә. Бу хакта “Татар–информ” агентлыгына ТР Авыл хуҗалыгы һәм азык–төлек министрлыгыннан хәбәр иттеләр.
Бүгенге көндә 707,2 мең тонна татлы тамыр казып алынган, уңыш гектарыннан уртача 224 центнер тәшкил итә. Татлы тамырның тулай җыемы буенча Зәй районы әйдәп бара, әлеге районда 161,7 мең тонна шикәр чөгендере җыеп алынган, уңыш гектарыннан 265 центнерга җитә. Сарман районында – 150,9 мең тонна (300 центнер), Буа районында – 93,5 мең (183 центнер), Нурлат районында 97,7 мең тонна (202 центнер) шикәр чөгендере казып алынган.