Татарстанда органик продукция җитештерүче хуҗалыкларга 10 млн сум субсидия бирелә

Органик продукциягә туры килүе турындагы беренче сертификат Мамадыш районы хуҗалыгына бирелгән.

(Казан, 11 май, «Татар-информ», Гөлүзә Ибраһимова). Татарстанда ашлама кулланмыйча продукция җитештерүгә күчкән хуҗалыкларга 10 млн сум субсидия биреләчәк.

«Республикада үсеш алган яңа юнәлеш — органик продукция җитештерү. Федераль норматив база кабул ителгәннән соң, төбәк законын формалаштыру белән беррәттән, бу юнәлештә эш башланды. Бүген унга якын хуҗалык органик продукция һәм чимал җитештерүгә күчү турында карар кабул итте», — дип сөйләде ТР авыл хуҗалыгы һәм азык-төлек министры Марат Җәббаров.

Ел башында Мамадыш районындагы бер хуҗалыкка органик продукциягә туры килүе турында беренче сертификат тапшырылган.

«Органик продукция җитештерүче хуҗалыклар ашламадан башка гына эшли. Ул экологик яктан чиста продукт була. Ашламадан башка үскән уңышның уңдырышлылыгы башка булуны аңлыйбыз. Ул продукция кыйммәт була, тик сату белән авырлыклар юк», — дип сөйләде министр.