Татарстанда 69 процент мәйданга көзге культуралар чәчелгән

Көзге чәчү эшләре 484,2 мең гектарда үткәрелгән

  (Казан, 10 сентябрь, «Татар-информ», Ирина Игнатьева). Татарстанда 69 процент мәйданга көзге культуралар чәчелгән. Көзге чәчү эшләре 484,2 мең гектарда башкарылган, дип хәбәр ителә ТР авыл хуҗалыгы һәм азык-төлек министрлыгында.
Әгерҗе районы игенчеләре билгеләнгән мәйданның 87 процентына көзге культураларны чәчкән, Буа районында – 85 процент, Спас - 84, Әлки – 83, Лаеш һәм Апаста – 80 шәр.
Менделеевск, Тукай, Ютазы, Чирмешән, Бөгелмә, Түбән Кама, Мамадыш һәм Мөслим районнарында көзге чәчүлекләр өчен билгеләнгән кырның 10-58 процентына гына чәчелгән.
Быел көзге чәчү үткәрү белән соңга калучылар юк. Һава шартлары яхшы тору һәм туфракта дым җитәрлек булу сәбәпле, кайбер көзге культуралар тиз үсеп китте. Агрономнар, артык үсеп киткән үсемлекләр кышлап чыга алмас, дип борчыла.