Марат Әхмәтов Татарстанның иң яхшы аграрийларын мактау билгеләре белән бүләкләде

Лидерларны берничә категория (продукция сатуның рентабельлелеге һәм бер хезмәткәргә 180 мең сумнан да ким булмаган тулай керем) буенча сайладылар
(Казан, 10 июнь, “Татар–информ”). Бүген Татарстан Авыл хуҗалыгы һәм азык–төлек министрлыгында 2008 елда башкарылган эш нәтиҗәләре буенча иң яхшы җитештерү–икътисади күрсәткечләргә ия авыл хуҗалыгы предприятиесе җитәкчеләрен хөрмәтләделәр. Бу хакта “Татар–информ” агентлыгына министрлыктан хәбәр иттеләр.
“Агросәнәгать комплексы лидеры” мактау билгеләрен ТР Премьер–министры урынбасары – авыл хуҗалыгы һәм азык–төлек министры Марат Әхмәтов тапшырды. Лидерларны берничә категория (продукция сатуның рентабельлелеге (16 проценттан югарырак) һәм бер хезмәткәргә 180 мең сумнан да ким булмаган тулай керем) буенча сайладылар
Бүләкләнүчеләр арасында Балтач, Кукмара, Актаныш, Тукай, Чүпрәле, Алексеевски, Әтнә, Ютазы һәм Тәтеш районнары хуҗалык җитәкчеләре бар.