Татарстанның тагын өч районында бөртеклеләрне урып-җыю төгәлләнде

Урып-җыю кампаниясе башланганнан бирле республикада 4 млн тонна ашлык җыелган.
(Казан, 9 сентябрь, “Татар-информ”). Соңгы ике көндә республикада Аксубай, Әтнә һәм Спас районнарында бөртеклеләрне урып-җыю тәмамланды. Бу хакта “Татар-информ”га республиканың Авыл хуҗалыгы һәм азык-төлек министрлыгының матбугат хезмәтендә хәбәр иттеләр. Алдарак “Татар-информ” Нурлат, Апас, Кайбыч һәм Зәй районнарының республикада беренчеләрдән булып әлеге культураларны урып-җыюны төгәлләвен дип хәбәр иткән иде.Министрлыкта хәбәр итүләренчә, 9 сентябрьгә республикада бөртекле һәм кузаклы культуралар 1 млн 322,2 мең гектарда, ягъни чәчүлекләрнең 93 процентында җыеп алынган.“Бүгенгә 3 млн 967,5 мең тонна ашлык суктырылган. Бу узган елның шушы датасына булган күрсәткечтән 375 тоннага артыграк”, - диде министрлыкның игенчелек тармагын үстерү бүлеге җитәкчесе Ирек Садыйков.“Урып-җыюны төгәлләгән районнар арасында иң күп ашлык Зәй районында суктырылган – 152,2 мең тонна. Икенче урында Нурлат районы – 103,5 мең тонна, өченче урында Спас районы – 100,8 мең тонна”, - диде Ирек Садыйков.“Беренче бишлектә бу күрсәткеч буенча Тукай һәм Мамадыш районнары да бар. Анда уңыш күләме бер гектарга 39,5 центнерны тәшкил итә. Актаныш районында – 39 ц/га һәм Минзәләдә – 38,1 ц/га”, - диде Ирек Садыйков.