Авыл 6 август 2021 07:23

11 сентябрьдә Казанда көзге авыл хуҗалыгы ярминкәләре башлана

Сәүдә 15 мәйданчыкта алып барылыр дип планлаштырыла.

Скопировать ссылку

(Казан, 6 август, «Татар-информ»). Казанда 11 сентябрьдә традицион көзге авыл хуҗалыгы ярминкәләре башлана, алар декабрьгә кадәр дәвам итәчәк.

Әмма түбән бәяләрдән продуктлар сатып алу 7 августтан башлана. Җәйге ярминкәләр Татарстан башкаласында кибетләрдәге бәяләр белән вазгыятьне тотрыкландыру өчен оештырылган.

Казан халкы арзан бәядән азык-төлек сатып ала алырлык махсус ярминкәләр шәһәрнең төрле районнарында биш чатыр ярминкә мәйданчыгында үткәреләчәк, дип искәртте Кулланучылар базары комитеты рәисе Руслан Фазылҗанов.

«Җәй башында җиләк-җимеш продукциясенә бәяләр арту булды, шуңа күрә базарда вазгыятьне тотрыкландыру һәм шәһәр халкын авыл хуҗалыгы продукциясе белән тәэмин итү өчен мондый ярминкәләр оештырыла», — дип аңлатты Кулланучылар базарының комитет рәисе.

Моннан тыш, сентябрьдә, уңыш җыелгач, традицион авыл хуҗалыгы ярминкәләре башлана, алар Татарстан Республикасы Авыл хуҗалыгы һәм азык-төлек министрлыгы белән берлектә оештырыла. Сәүдә 15 мәйданчыкта алып барылыр дип планлаштырыла, әмма аларның саны артырга мөмкин, дип билгеләде спикер.

Сәхифәләр

11 сентябрьдә Казанда көзге авыл хуҗалыгы ярминкәләре башлана