Татарстанда барлык чәчү эшенең 9 проценты төгәлләнгән

Республикада уҗымнарны һәм күпьеллык үләннәрне тукландыру дәвам итә, тырмалау эшләре бара.

(Казан, 2 май, “Татар-информ”).  Татарстан Авыл хуҗалыгы һәм азык-төлек министрлыгының 2 майга булган оператив мәгълүматларына караганда, Татарстанда бүгенге көнгә язгы сабан культураларын чәчү эше 158,6 мең гектарда (9 процентта) башкарылган. Шул исәптән, бөртекле сабан культуралары 120,9 мең гектарда чәчелгән. Бу – пландагы эшнең 12 проценты.

Уҗымнар һәм күпьеллык үләннәрне тукландыру 877 мең гектарда башкарылган, бу планның 82 процентын тәшкил итә. Аерым алганда, күпьеллык үләннәр 371,3 мең гектарда, ягъни 74 процентка; уҗымнар 505, 7 мең гектарда (88 процентта) тукландырылган.

Барлык тырмалау эшләре 1471,4 мең гектарда башкарылган, ягъни 44 процентка үтәлгән. Уҗымнар 219,5 мең гектарда (38 процент), туңга сөрелгән һәм парга калдырылган җирләр 847,6 мең гектар (37 процент) мәйданда тырмаланган. Бу хакта Татарстан Авыл хуҗалыгы һәм азык-төлек министрлыгы матбугат хезмәте хәбәр итә.