ҺАВА ТОРЫШЫ -1 oC

Яңалыклар

барлык хәбәрләр Татарстан Россия

Авыл

Кукмарада сөт җыючы кооперативлар оеша

2 ноябрь 2019, 19:15 , Фото: архив/Султан Исхаков

Кукмарада сөт җыючы кооперативлар оеша Сөткә бәяләр артачак, дип ышандыра кооператив рәисләре

(Кукмара, 2 ноябрь, "Татар-информ", "Хезмәт даны", Ризилә Корбанова). Сөт җыю белән бәйле мәсьәләләрне җайга салу максатыннан, Кукмара районында кооперативлар оеша башлады. "Әмирхан", "Монокорм", "Ансар" кооперативлары сөт тапшыручы шәхси ярдәмче хуҗалыклар белән килешү төзи. Бу турыда район бамасы хәбәр итә.

Ә кооператив аша тапшырылган сөт өчен республиканың Авыл хуҗалыгы һәм азык-төлек министрлыгыннан субсидия бүлеп бирү каралган. Шуның хисабына сөтнең хакы литрына 1-1,5 сумга артыр, дип көтелә, - диде район авыл хуҗалыгы һәм азык-төлек идарәсе җитәкчесенең урынбасары Илһам Ганиев.

"Көн саен иртә белән безнең биш машина шәхси хуҗалыкларга сөт җыярга чыгып китә. 400дән артык хуҗалыктан биш тонна тирәсе сөт кайта. Кыш көне исә сөтнең күләме дүрт тоннага гына кала. Авыллар күп, аралары ерак. Әйтик, бер машинага 1 тонна тирәсе сөт җыяр өчен ун авылны әйләнергә туры килә", - диде "Ансар" авыл хуҗалыгы кооперативы гамәлгә куючысы Нурсил Тәҗмиев.

"Халыкны кызыксындыру, мал санын арттыру максатыннан, кооператив оештырырга булдык. Без башка кооперативлар белән дә элемтәгә керәбез. Тәҗрибә максатыннан, кайбер хуҗалыкларга монокорм кайтарта башладык", ди ул.

Кооперативның өстенлекләре күп: мал санын арттырырга теләгән, әмма акчасы булмаган шәхси хуҗалыклар аның аша сыер яки тана сатып алырга мөмкин. Бу чыгымнарның да 50 проценты дәүләттән субсидия формасында әйләнеп кайтачак.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10