ҺАВА ТОРЫШЫ +2 oC

Яңалыклар

барлык хәбәрләр Татарстан Россия

Хәвеф-хәтәр

Казан кунакханәсендә футболчы балалар агуланганнан соң җинаять эше ачылган

2 ноябрь 2019, 11:35

Хастаханәгә алты баланы китергәннәр, алар косу һәм эч авыртуга зарлана.

(Казан, 2 ноябрь, «Татар-информ»). Казанның «Кристалл» кунакханәсендә яшь футболчылар агуланганнан соң җинаять эше ачылган. Бу хакта «Татар-информ» агентлыгына Россия Тикшерү комитеты ТР буенча идарәсе җитәкчесенең өлкән ярдәмчесе хәбәр итте.

7-10 яшьлек балалар Татарстан башкаласына Россиянең төрле төбәкләреннән ярышларда катнашу өчен килгән һәм «Кристалл» кунакханәсендә тукталган. 1 ноябрьдә балалар эчләре авырту, косуга зарланган һәм кунакханәгә ике ашыгыч ярдәм бригадасын чакырганнар.

Тикшерүчеләр ачыклаганча, 1 ноябрьдә Казанда 31 бала хастаханәгә мөрәҗәгать иткән. Табиблар караганнан соң, 6 баланы хастаханәгә озатканнар.

Башлангыч мәгълүматларга караганда, барлык балалар да кунакханәнең ресторанында тукланган. Әлеге факт буенча «Куркынычсызлык таләпләренә җавап бирми торган хезмәтләр күрсәтү» маддәсе буенча җинаять эше кузгатылган.

Моңа кадәр «Татар-информ» агентлыгы ТР прокуратурасының гаммәви мәгълүмат чараларында дөнья күргән, балаларның агулануы турындагы мәгълүматны тикшерүе хакында хәбәр иткән иде.

Соңрак ТР Сәламәтлек саклау министрлыгында шәһәрнең йогышлы авырулар хастаханәсенә агулану билгеләре белән 6 бала китерелүен расладылар. Табиблар аларның хәлен канәгатьләндерерлек дип бәяли.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10