ҺАВА ТОРЫШЫ +3 oC

Яңалыклар

барлык хәбәрләр Татарстан Россия

Җәмгыять

Минзәләдә карантин игълан ителгән

27 октябрь 2019, 16:44

Карантин, торак пунктта терлекләрдә котыру авыруы булу сәбәпле, указ белән билгеләнгән.

(Казан, 27 октябрь, «Татар-информ»). Татарстан Республикасы Минзәлә муниципаль районының Минзәлә шәһәренең аерым территориясендә карантин игълан ителгән. Татарстан Президенты Рөстәм Миңнеханов тарафыннан имзаланган боерык «Рәсми Татарстан» порталында басылып чыкты.

«Татарстан Республикасы Минзәлә районының Минзәлә шәһәрендә Социалистик урамындагы 109-163 номерлы йортларның шәхси хуҗалыклары территориясендә терлекләр котыру авыруы күзәтелүе сәбәпле карантин билгеләргә», диелгән документта.

Указ нигезендә, бу территориядә йорт хайваннары белән сәүдә итү, аларны тиешле территориядән читкә чыгару һәм кыргый хайваннар аулау, авыру яки сәламәт булуына шик булган терлекләрне чалу, сату, авыру терлекләрнең сөтен башка терлекләргә эчертү тыела.

Шулай ук клиник сәламәт терлекләрдән савылган сөтне зарарсызландырылмаган килеш ризыкка куллану һәм хайваннарга эчертү, әлеге торак пункт территориясеннән клиник сәламәт хайваннардан алынган һәм дезинфекция узмаган йон, тире чыгару тыела.

Татарстан Министрлар Кабинетының Баш ветеринария идарәсенә терлекләрнең котыру авыруын бетерү буенча чаралар планын эшләргә һәм расларга кушылды. Тиешле чаралар башкарылган очракта, терлекләр котыру авыруының соңгы очрагыннан соң ике ай узгач, карантин гамәлдән чыгарылырга тиеш.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10