ҺАВА ТОРЫШЫ +1 oC

Яңалыклар

барлык хәбәрләр Татарстан Россия

Җәмгыять

Сукбай хайваннарны тоту һәм карау өчен акча икеләтә артачак

23 октябрь 2019, 15:15 , Фото: архив/Александр Эшкинин

Сукбай хайваннарны тоту һәм карау өчен акча икеләтә артачак Закон проекты нигезендә, бу максатларга республика бюджетыннан чыгым 56,5 млн сумга җиткереләчәк.

(Казан, 23 октябрь, “Татар-информ”, Гөлнар Гарифуллина). Сукбай хайваннарны тоту һәм карау өчен акча икеләтә артачак. Бүген бу хакта VI чакырылыш Татарстан Дәүләт Советының дүртенче утырышында билгеле булды.

Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Таһир Һадиев әйтүенчә, закон проекты республика законын федераль законга тәңгәлләштерү максаты белән эшләнгән.

Законны кабул итү республика бюджетының чыгым өлешен 56,5 млн сумга кадәр арттыруны таләп итәчәк. Быел бюджеттан субвенцияләр күләме 27,5 млн сум булган. Хәзер финанслау икеләтә артачак.

Документ нигезендә, муниципалитетларның сукбай хайваннарны тоту һәм тәрбияләүгә норматив чыгымнарын күздә тотып, субвенцияләрне исәпләү методикасы яңа редакциядә басылган. Субвенция хайваннарны тоту, аларны хайваннар приютына илтү, тыныч холыклыларын кире урыннарына яки дәвалау учреждениеләренә илтү, стерилизациягә (кастрация), дәваланмый торган чирләре булганнарны агулап үтерүгә сарыф ителгән чыгымнарны күздә тота.

Таһир Һадиев сукбай хайваннарны тоту, тәрбияләү өлкәсендә республика законы үтәлеше, бу максатларга бирелә торган акчаның нәтиҗәлелеге турында сорау профильле комитетның даими контролендә булуын искәртте. Аның фикеренчә, закон проекты гражданнарның иминлегенә дә, хайваннарга миһербанлы карашка да йөз тота.

Җирле үзидарә органнарына сукбай хайваннарны тоту, карау, дәвалау, авыруларны кисәтү чараларын оештыру өлкәсендә вәкаләтләр бирү турында республика законына үзгәрешләр кертү турында закон проекты беренче укылышта һәм тулаем кабул ителде.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10