ҺАВА ТОРЫШЫ +1 oC

Яңалыклар

барлык хәбәрләр Татарстан Россия

Мәдәният

«Шомбай-fest-2019» фестивале курчаклар парады белән башланды

23 октябрь 2019, 13:18 , Фото: Рамиль Гали

«Шомбай-fest-2019» фестивале курчаклар парады белән башланды Курчак театры фестивале 28 октябрьгә кадәр дәвам итә.

(Казан, 23 октябрь, «Татар-информ», Рузилә Мөхәммәтова). «Шомбай-fest-2019» халыкара курчак театрлары фестивале Петербург урамында курчаклар парады белән башланып китте. Бүген Казанда старт алган Курчак театрлары фестивалендә чит илләрдән һәм Россия регионнарыннан 17 курчак театры коллективы катнаша.

Фестиваль ачылу тантанасы «Әкият» Татар дәүләт курчак театры фойесында дәвам итте. Кунакларга жюри әгъзалары һәм балалар жюриы тәкъдим ителде.

«Әкият» Татар дәүләт курчак театры һәм фестиваль директоры Роза Яппарова сәламләү чыгышында катнашучыларны Казан һәм аның данлы шәхесләре белән таныштырды. Ульянов-Ленин, Державин, Бутлеров, Аксенов, Шаляпин кебек шәхесләр, шулай ук Тукай турында мәгълүмат биреп, шигырьләреннән өзек яңгырады.

“Фестиваль - ул спектакль күрсәтү генә түгел, аралашу да, курчак театры артистларының туганлыгы да. Без сезне татар традициясе буенча чәк-чәк белән каршылыйбыз. Спектакль алдыннан чәй белән сыйланыгыз!” – диде кунакчыл хуҗа.

Казанда Италия, Франция, Беларусь театрлары үз спектакльләрен тәкъдим итәчәк. Оештыручылар фестиваль программасының сыйфаты белән горурлана, Казан фестиваленә иң данлыклы коллективларның чакырылуын әйтә.

Фестивальне Чуваш дәүләт курчак театры Пушкинның “Балыкчы һәм балык турында әкият”е белән ача. Ә зур залда 15.00 һәм 19.00 сәгатьләрдә “Алтын битлек” театр премиясе лауреаты Евгений Ибраһимов өлкәннәр өчен куелган “Побег” спектаклен тәкъдим итә. Спектакльне Красноярск курчак театры алып килде.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10