ҺАВА ТОРЫШЫ +4 oC

Яңалыклар

барлык хәбәрләр Татарстан Россия

Җәмгыять

Тукай районының Иштирәк авылында үзенчәлекле музей эшли

13 октябрь 2019, 06:27 , Фото: zainsk-rt.ru/

Тукай районының Иштирәк авылында үзенчәлекле музей эшли Вагыйзь Сайфуллин үз йортында музей оештырган.

(Казан, 13 октябрь, "Татар-информ"). Тукай районында узган “Ак калфак” татар хатын-кызлар оешмасы утырышында катнашучыларга әлеге районның Иштирәк авылында яшәүче Вагыйзь Сайфуллин булдырган үзенчәлекле музейга сәфәр оештырдылар. Бу турыда  "Зәй офыклары" басмасы хәбәр итә.

Вагыйзь - һөнәре буенча табиб, Түбән Кама шәhәрендә яши. Ул рәсем ясарга һәвәс. Моңа өстәп, дустыннан аңа элекке заманда кулланылган, бүгенге көндә онытылып барган көнкүреш әйберләрен җыю белән мавыга. 

Вагыйзь Сайфуллинның Иштирәктәге йорты капка төбеннән өйгә, лапаска кадәр экспонатлар белән тулган. Йортның верандасында китаплар, энциклопедияләр урын алган, ул аларны чүплектән дә табып алып кайттым, ди. Верандада шулай ук самавырларның ниндиләре генә юк.

Иң гаҗәпләндергәне, йорт капкасын ачып керүгә, һәркемне Владимир Ленин, Иосиф Сталин, Никита Хрущев, Леонид Брежнев, Михаил Горбачев, Борис Ельцин фотосурәтләре каршы ала. 

Ишегалды буйлап «Иж», «Урал», «Минск» мотоцикллары, «Москвич», «Запорожец» машиналары тезелеп киткән. Чабата кадәр йозаклар, тегү машиналары, герле-күкеле сәгатьләр, үтүкләр, чүлмәкләр, Болгар заманыннан калган үлчәүләр, картиналар тезеп куелган. Өстәлдәге басма матбугатның исә иге-чиге юк. Алар кайларда нинди елларда гына дөнья күрмәгән.

Аш-су бүлмәсе дә борынгы тимер вазалар, савыт-сабалар белән тулы, биредә төрле чорларда кулланылган акчалар, тәңкәләр, шамаилләр тезелгән.

Иштирәклеләр әлеге тарихи мираслы музей белән горурлана. Яшь буынга әби-бабайлар яшәгән чорны күрсәтү, аларда туган җиргә хөрмәт hәм мәхәббәт тәрбияләү - үзе ватанпәрвәрлек ул.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10