ҺАВА ТОРЫШЫ +4 oC

Яңалыклар

барлык хәбәрләр Татарстан Россия

Җәмгыять

Саба районында медицина персоналын һәм кешеләрне ашыгыч эвакуацияләделәр

22 сентябрь 2019, 05:00 , Фото: saby-rt.ru/

Саба районында медицина персоналын һәм кешеләрне ашыгыч эвакуацияләделәр Әлеге чара "Экстремизмга –юк!" айлыгы барышында гражданнарны эвакуацияләү буенча өйрәнүләр буларак уздырылды.

(Саба, 22 сентябрь, "Татар-информ", "Саба таңнары", Фәнил Мәүлетов). Узган җомгада Саба районы үзәк хастаханәсе поликлиникасында 13 сәгать 30 минутлар тирәсендә ыгы-зыгы кубып алды. Хастаханәдә шикле пакет булуы турында хәбәр таралды. Биредән медицина персоналын һәм анда булган кешеләрне ашыгыч эвакуацияләделәр. Бу турыда район басмасы яза.

Педиатр-табиб Радик Мусинның балаларны кабул итү бүлеге коридорында шикле кара пакет күреп алуы турында хәбәр ителде. Ул бу хакта шунда ук хастаханәнең гражданнар оборонасы медицина хезмәтенә хәбәр итә.

Тиз арада бинадан кешеләрне имин урынга чыгару чаралары күрелә. Ул да булмый, сигнал алынган объектка янгын сүндерүчеләр, Эчке эшләр министрлыгының Саба бүлеге, Гадәттән тыш хәлләр министрлыгының район бүлекчәсе хезмәткәрләре, газ хезмәте машинасы килеп җитте. Алар оператив төстә үзләренә йөкләнгән бурычны үтәүгә керештеләр.

Бомба турындагы шик чын булмады. Әлеге чара "Экстремизмга –юк!" айлыгы барышында гражданнарны эвакуацияләү буенча өйрәнүләр буларак уздырылды.

"Медицина учреждениеләрендә террорчылык актлары ихтималы очракларына әзерлекне камилләштерү максаты белән гамәли-тактик өйрәнүләр системалы үткәрелә. Персонал гадәттән тыш хәлләрдә үзләрен ничек тота, инструкцияләр ничек үтәлә – шулар тикшерелде. Өйрәнүләр барышында, авыруларны исәпкә алып, 6 минут эчендә 150гә якын кеше эвакуацияләнде. Вакытка сыешу хезмәткәрләрнең оешканлыгын һәм мондый гадәттән тыш очракларга яхшы әзерлеген күрсәтте", – ди Саба үзәк хастаханәсе гражданнар оборонасы медицина хезмәте штабы начальнигы Айгөл Шакирҗанова.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10