ҺАВА ТОРЫШЫ +3 oC

Яңалыклар

барлык хәбәрләр Татарстан Россия

Сәясәт

Дәүләт Советының өченче утырышында яңа дәүләт бүләкләрен гамәлгә кую каралачак

20 сентябрь 2019, 19:33

25 сентябрьдә Казанда алтынчы чакырылыш Татарстан Дәүләт Советының ике утырышы узачак.

(Казан, 20 сентябрь, «Татар-информ», Надежда Гордеева). Алтынчы чакырылыш Татарстан Дәүләт Советының өченче утырышы 25 сентябрьдә узачак. Депутатлар беренче укылышта каралачак закон проектларының берсе республиканың яңа дәүләт бүләкләре — «ТАССР төзелүгә 100 ел» медале белән бәйле. Бу хакта бүген республика парламенты президиумы утырышында билгеле булды.

Татарстан Дәүләт Советы Секретаре Лилия Маврина хәбәр иткәнчә, парламентның киләсе утырышы көн тәртибенә 22 мәсьәлә кертелә, шул исәптән 11 закон проекты беренче укылышта каралачак.

Аерым алганда, депутатлар Татарстан Бюджет кодексына үзгәрешләр, «2020 елга Татарстан хезмәт базары үзенчәлекләрен чагылдыра торган региональ коэффициентны билгеләү турында»гы, «Пенсиягә федераль социаль өстәмә күләмен билгеләү өчен 2020 елга Татарстан Республикасында пенсионерның яшәү минимумы күләмен билгеләү турында»гы закон проектлары хакында фикер алышачак.

Беренче укылышта шулай ук «Татарстан Республикасында җирле үзидарә турында»гы, «Тоткарланган транспорт чараларын махсуслаштырылган урынга күчерү, аларны саклау, кире кайтару, күчерү һәм саклау бәясен түләү тәртибе турында»гы, «Татарстан Республикасы дәүләт бүләкләре турында»гы һәм башка республика законнарына үзгәрешләр кертү белән бәйле закон проектларын карау планлаштырыла.

Лилия Маврина сүзләренчә, шулай ук төрле юнәлешләрдәге алты федераль закон проекты буенча фикер алышырга тәкъдим ителәчәк.

 

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10