ҺАВА ТОРЫШЫ +7 oC

Яңалыклар

барлык хәбәрләр Татарстан Россия

Мәдәният

Татарстанда музыка сәнгатен үстерүдә дәүләт программасы кертелергә мөмкин

11 сентябрь 2019, 18:25 , Фото: архив

Татарстанда музыка сәнгатен үстерүдә дәүләт программасы кертелергә мөмкин “Бүгенге көндә программа эшләнү буенча сүз алып барыла”, - ди Разил Вәлиев.

(Казан, 11 сентябрь, “Татар-информ”, Зилә Мөбәрәкшина). Бүгенге көндә Татарстанда музыка сәнгатен үстерүдә дәүләт программасы эшләнү турында сүз алып барыла. Бу хакта Татарстанның халык шагыйре Разил Вәлиев “Шаляпин Палас” отелендә үткән матбугат очрашуында хәбәр итте.

“Аның концепциясе эшләнде, киләчәктә, телләр турында дәүләт программасы булган кебек, музыка сәнгатен үстерү, алга җибәрү буенча дәүләт программасы булырга тиеш”, - диде ул.

Разил Вәлиев Татарстан Дәүләт Советында комитет утырышы уздырылганын әйтте. “Бу эшне без Мәдәният министрлыгы белән бергәләп алып барабыз. Аны башкарганда күз алдыбызда һәрвакыт татар җырының, моңының эталоны булып күренекле җырчыбыз Илһам Шакиров булырга тиеш”, - диде ул.

“Соңгы елларда күреп торабыз, татар җыры үзенең милли үзенчәлеген югалта башлады. Татар җырын тыңлаганда, әгәр сүзләре татарча булмаса, кайсы милләтнең җыры икәнен аңлап та булмас иде”, - диде халык шагыйре.

Разил Вәлиев фикеренчә, Илһам Шакиров эталон булмаса, акрын-акрын татар җыр сәнгатендә милли үзенчәлекнең югалуы ихтимал. “Халык хуплаганда гына зур эшләр башкарып булачак”, - диде ул.

“Туксанынчы елларда без ни өчен шактый зур уңышларга ирештек, законнар, карарлар кабул иттек? Халык яклаганга күрә. Әгәр дә халык аңламаган, таләп итмәгән булса, боларның берсе дә бу хәлдә булмас иде. Бүген дә без милләтебезнең киләчәге турында уйлыйбыз икән, безгә халык белән ныграк эшләргә кирәк”, - диде Разил Вәлиев.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10