ҺАВА ТОРЫШЫ +14 oC

Яңалыклар

барлык хәбәрләр Татарстан Россия

Җәмгыять

"Шәфкать" үзәгендә тәрбияләнүче бала Бөтенроссия фестивалендә җиңү яулады

10 сентябрь 2019, 15:52 , Фото: mtsz.tatarstan.ru

Алия Гарифуллина Сергей Есенинның "Ана хаты" әсәре белән "Нәфис уку, автор сүзе" номинациясендә чыгыш ясады.

(Казан, 10 сентябрь, "Татар-информ"). Кукмараның "Шәфкать" мөмкинлекләре чикле балалар һәм яшүсмерләр тернәкләндерү үзәгендә тәрбияләнүче Алия Гарифуллина "Чиксез тормыш" дип исемләнгән IX нче Бөтенроссия инвалид балалар фестивалендә катнашып җиңү яулады. Бу турыда ТР Хезмәт, халыкны эш белән тәэмин итү һәм соөиаль яклау министрлыгы матбугат хезмәте хәбәр итте.

Мәскәү дәүләт гуманитар икътисад университеты оештырган әлеге талантлы яшьләр форумында ул Сергей Есенинның "Ана хаты" әсәре белән "Нәфис уку, автор сүзе" номинациясендә чыгыш ясады. Үз номинациясендә 15 катнашучы арасында Алия җиңүче булды, гала-концертта чыгыш ясады һәм катнашучы дипломы белән бүләкләнде. Аның кураторы - тернәкләндерү үзәгенең музыка җитәкчесе Ленар Баймиевка фестивальнең Рәхмәт хаты тапшырылды.

Фестивальнең максаты - иҗади яктан сәләтле яшьләрне ачыклау, аларның иҗади сәләтләрен үстерү. Катнашучылар өчен мастер-класслар, "Москвариум"га бару оештырылды. Балалар чын профессионаллар белән очрашып, кызыксындырган сорауларга җаваплар алды, алга таба иҗади камилләштерү һәм үсеш мәсьәләләре буенча киңәшләштеләр.

Мондый масштабтагы фестивальләрдә катнашу инвалидлыгы булган балаларга үз көчләренә ышанырга мөмкинлек бирә, тормышта яңа офыклар ача. Бу тернәкләндерү үзәкләренә йөрүче инвалид балалар өчен яхшы үрнәк.

Алиянең мисалы - өстәмә белем бирү түгәрәкләрендә һәм секцияләрендә чарланып, зур уңышларга ирешергә мөмкинлек бирүнең ачык күрсәткече. Иң мөһиме - балага үз потенциалын ачарга ярдәм итү, диелә хәбәрдә.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10