ҺАВА ТОРЫШЫ -5 oC

Яңалыклар

барлык хәбәрләр Татарстан Россия

Икътисад

Роботлар 2030 елга россиялеләрнең яртысына якынын эшсез калдырырга мөмкин

10 сентябрь 2019, 11:55

Бигрәк тә кунакханә һәм ресторан бизнесы хезмәткәрләренә эшсез калу куркынычы яный.

(Казан, 10 сентябрь, «Татар-информ»). 2030 елга россиялеләрнең яртысына якыны (45,5 процент) цифрлаштыру һәм автоматлаштыру нәтиҗәсендә эшеннән колак кагарга мөмкин. Бу хакта «Известия» газетасы РФ Президенты каршындагы Россия халык хуҗалыгы һәм дәүләт хезмәте академиясе белгечләренең тикшеренүләренә сылтама белән хәбәр итә.

Басма мәгълүматлары буенча, тәҗрибә һәм белемнәре актуаль булудан туктау сәбәпле, 20,1 миллион кеше эш урыннарыннан китәргә яки квалификацияләрен алыштырырга мәҗбүр булачак.

Тикшеренү нәтиҗәләреннән күренгәнчә, бигрәк тә кунакханә һәм ресторан бизнесы хезмәткәрләренә (73 процент) эшсез калу куркынычы яный. Моннан тыш, роботлар җитештерү сәнәгате вәкилләренең - 60, авыл һәм урман хуҗалыгы хезмәткәрләренең - 58, ваклап сәүдә итү өлкәсендә эшләүчеләрнең – 53, файдалы казылмалар чыгару өлкәсендә мәшгуль затларның 51 процентын алыштырырга мөмкин.

Шул ук вакытта, тикшеренүнең авторы, РФ Президенты каршындагы Россия халык хуҗалыгы һәм дәүләт хезмәте академиясенең эшкуарлык проблемаларын тикшерү лабораториясе мөдире вазифаларын вакытлыча башкаручы Степан Земцов белдергәнчә, шундый куркыныч янаса да, бу сине иртәгә үк алыштырачаклар дигәнне аңлатмый.

Моңа кадәр Россия Фәннәр академиясенең Кабарда-Балкар фәнни үзәгендә октябрь ахырына «робот-ретейлер»ны тәкъдим итәргә ышандырганнар иде. Ул зур ретейлерлык челтәрләрендә җитештерүдәге бурычларны хәл итүдә кешене алыштыра алачак.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10