ҺАВА ТОРЫШЫ +15 oC

Яңалыклар

барлык хәбәрләр Татарстан Россия

Сәясәт

Дәүләт Советына сайлаулар көнендә Алабугада 61 сайлау участогы ачылачак

6 сентябрь 2019, 16:29 , Фото: архив/Михаил Захаров

Дәүләт Советына сайлаулар көнендә Алабугада 61 сайлау участогы ачылачак
 Шул ук көнне шәһәрдә һәм районда җирле үзидарәнең вәкиллекле органнары депутатларын өстәмә сайлаулар узачак.

(Алабуга, 6 сентябрь, «Татар-информ», Гөлнара Салихова). 8 сентябрьдә Алабугада һәм Алабуга районнарында бердәм тавыш бирү көнендә 61 сайлау участогы ачылачак. Аларның 39ы шәһәрдә урнашачак. Бу хакта Территориаль сайлау комиссиясе рәисе Андрей Смирнов хәбәр итте.

8 сентябрьдә сайлаучыларга ике бюллетень — бер мандатлы округ һәм партия исемлекләре буенча тавыш бирергә туры киләчәк. Алабугадан җиде кандидат катнаша, исемлекләр буенча шулай ук җиде партия. «Татарстан Дәүләт Советына депутатлар сайлауны үткәрү өчен безнең шәһәрдә 39 участок формалаштырылган, шул исәптән аларның берсе район үзәк хастаханәсендә урнашачак. Шәһәр буенча сайлаучылар саны - 52,4 мең кеше», - дип сөйләде Территориаль сайлау комиссиясе рәисе Андрей Смирнов.

Сайлау участоклары иртәнге сәгать 7дән 20.00 сәгатькә кадәр эшләячәк. Шул ук көнне җирле үзидарә вәкиллекле органнары депутатларын өстәмә сайлаулар да узачак. Алар биш участокта уза, шуларның берсе шәһәрдә, калганнары авылларда.

8 сентябрьдә барлык сайлау участокларында да сәүдә һәм концерт программасы оештырылачак. Моннан тыш, 3нче һәм 8нче мәктәпләрдә һәм 4нче гимназиядә теләгән һәркемгә гриппка каршы прививка ясатачаклар. Вакцинацияне мәктәпләрнең сәламәтлек саклау пунктларында уздырачаклар.

Шул ук көнне «Безнең ишегалды» программасы буенча да теләкләрне калдырырга була. 8 сентябрьдә, Татарстан Дәүләт Советына депутатлар сайлау көнендә, анкеталау узачак, анда шәһәр ишегалларын төзекләндерү буенча шәһәрлеләр үз теләкләрен җиткерә алачак. Моның өчен биредә махсус урналар урнаштырыла.


 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10