ҺАВА ТОРЫШЫ 0 oC

Яңалыклар

барлык хәбәрләр Татарстан Россия

Җәмгыять

Социалистик Хезмәт Герое Фәхразый Кәримов вафат

3 сентябрь 2019, 18:18

Социалистик Хезмәт Герое Фәхразый Кәримов вафат
Рөстәм Миңнеханов, Минтимер Шәймиев, Фәрит Мөхәммәтшин, Алексей Песошин, Әсгать Сәфәров, Марат Әхмәтов, Марсель Шәйдуллин кайгы уртаклашты.

(Казан, 3 сентябрь, «Татар-информ»). Бүген Социалистик Хезмәт Герое Фәхразый Шәмсимөхәммәт улы Кәримов вафат булды. Аңа 87 яшь иде.

Татарстан Президенты Рөстәм Миңнеханов, Дәүләт Киңәшчесе Минтимер Шәймиев, Дәүләт Советы Рәисе Фәрит Мөхәммәтшин, Премьер-министр Алексей Песошин, Президент Аппараты җитәкчесе Әсгать Сәфәров, Премьер-министр урынбасары - авыл хуҗалыгы һәм азык-төлек министры Марат Әхмәтов, Азнакай районы башлыгы Марсель Шәйдуллин мәрхүмнең якыннарының кайгысын уртаклашты.

Фәхразый Кәримов 1932 елның 16 сентябрендә Азнакай районы Чалпы авылында туа. 12 яшендә «Коммунизмга» колхозында комбайнчы булган апасына ярдәм итә башлый. Гомере буе туган авылында яши, тракторчы, бригадир, механизатор, комбайнчы, остаханә мөдире була. 1992 елда лаеклы ялга чыга, эшләвен дәвам итә. Ул яшьләргә аларга авыл хуҗалыгы техникасы белән эшләүдә белемнәр һәм күнекмәләр бирә.

Игенчелек продуктларын җитештерүне һәм дәүләткә сатуны арттыру буенча йөкләмәләрне үтәүдә ирешкән күренекле уңышлары өчен, 1981 елда Фәхразый Кәримовка Социалистик Хезмәт Герое исеме бирелә.  Аның күпьеллык тырыш хезмәте һәм казанышлары югары бүләкләргә, шул исәптән Хезмәт Кызыл Байрагы, Ленин орденнарына, СССР ВДНХ медальләренә, Мактау грамоталарына лаек булды.

Фәхразый Кәримов иҗтимагый эшчәнлек белән дә актив шөгыльләнә: районда берничә тапкыр депутат итеп сайлана, күп еллар Чалпы авыл җирлегенең ветераннар Советын җитәкли.

Фәхразый Шәмсимөхәммәт улы Кәримов, фидакарьләрчә хезмәт итүе, ватанпәрварлык хисләре белән мәңгелеккә безнең хәтердә калачак, диелә кайгы уртаклашу хәбәрендә.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10