ҺАВА ТОРЫШЫ +9 oC

Яңалыклар

барлык хәбәрләр Татарстан Россия

Җәмгыять

Әлки районы юл төзүчеләре Салман авылына яңа юл салган

30 август 2019, 02:00 , Фото: alki-rt.ru/

Әлки районы юл төзүчеләре Салман авылына яңа юл салган Халык үтенече буенча авылдагы буаны да әйбәтләп төзекләндерделәр.

(Әлки, 30 август, "Татар-информ", "Әлки хәбәрләре" ). Әлки районының ике кечкенә авылының юлларын яхшырттылар, Базарлы Матак һәм Салман арасындагы автомобиль трассасында төзү эшләре бара. Бу турыда район басмасы хәбәр итә.

 Чиябаштан – Мулланур Вахитовка һәм Югары Матактан Абдул Салманга кадәр элеккерәк елларда эксперимент рәвешендә комлы катнашмадан юл салынган иде. Әмма еллар узу белән бу юллар тузды. Быел әлеге ике авылга да республика программасы нигезендә вак таш-ком катнашмалы юл салу планлаштырылган иде.

Язын җирләр кипшенә башлау белән Чиябаштан Мулланур Вахитовка кадәр биш километрлы юл полотносында эшләр башланды. Әлеге юл төзелешенә алдан ук җитәрлек күләмдә диярлек материаллар ташып куелган иде. Шуңа да “Алексеевскдорстрой” җәмгыяте егетләре әлеге кече авылга юл төзелешен тиз башкарды. Бер ай дигәндә бистәгә чаклы һәм авылның төп урамы юлына буйдан буйга озак еллар хезмәт итәрлек юллар салдылар.

Аннан юл төзүчеләр техникалары белән Абдул Салман ягына күчтеләр. Югары Матактан әлеге авылга кадәр юлның озынлыгы 2,5 чакрым тәшкил итә. Әмма юлның бу өлеше ныграк тузган, күтәртелгән дамбаны да киңәйтергә туры килә.

“Алексеевскдорстрой” төзүчеләре бу якта яшәүче халыкны тагын бер эшләре белән шатландырдылар. Юлны сыйфатлы итеп салгач, халык үтенече буенча шундагы буаны да әйбәтләп төзекләндерделәр.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10