ҺАВА ТОРЫШЫ +5 oC

Яңалыклар

барлык хәбәрләр Татарстан Россия

Фән һәм мәгариф

Министрлар саммитында халыкара "Казан декларациясе" тәкъдим ителгән

24 август 2019, 16:44 , Фото: Михаил Захаров/архив

Министрлар саммитында халыкара Декларация WorldSkills хәрәкәтендә катнашкан илләрдә профессиональ белем бирү өлкәсен бердәм бәяләү стандартларын булдыруны күздә тота.

(Казан, 24 август, “Татар-информ”, Алсу Исмәгыйлева). WorldSkills Кazan 2019 чемпионаты кысаларында узган министрлар халыкара саммитында белем бирү өлкәсен бердәм бәяләү стандартларын булдыруны күздә тоткан документ тәкъдим ителгән. “Без аны үз арабызда “Казан декларациясе” дип атадык”, - диде саммиттан соң журналистлар белән очрашуда Россия мәгариф министры Ольга Васильева.

Министрлар халыкара саммитында WorldSkills хәрәкәтенә кергән 38 ил министрлары һәм алты халыкара оешма вәкилләре катнашкан.

“Хәзерге вакытта иң әһәмиятле мәсьәлә – белем бирү эчтәлеге һәм әзерлек сыйфаты, - диде министр. - Без кичә WorldSkills хәрәкәтендәге илләрдә урта профессиональ белем бирү өлкәсендәге белгечләрне бәяләүнең бердәм стандартларын булдыруны күздә тоткан документ тәкъдим иттек”.

Министр дөньяда технологияләрнең өзлексез үзгәреп торуын искәртте. Шуңа бәйле рәвештә сыйфатны бәяләү критерийларының барлык илләрдә тәңгәл булуын һәм барысына да аңлаешлы булуын телибез, диде ул.

Ольга Васильева декларациянең халыкара әһәмияткә ия булуын аңлатты. Документ тиешле булган барлык тикшерүләрне узганнан соң бердәм рәвештә кабул ителәчәк дип көтелә.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10