ҺАВА ТОРЫШЫ +5 oC

Яңалыклар

барлык хәбәрләр Татарстан Россия

Җәмгыять

Чирмешән районының Якты Тау авылы 90 еллык юбилеен үткәрде

20 август 2019, 03:00

Чирмешән районының Якты Тау авылы 90 еллык юбилеен үткәрде Якты Тауга 1927 нче елда нигез салынган.

(Чирмешән, 20 август, “Татар-информ“, “Безнең Чирмешән“, Кадыйр Гомәров). Чирмешән районының Якты Тау авылы 90 яшьлек юбилеен үткәрде. Бәйрәмне Зур болын дигән урында, үзләренчә, җыйнак кына, тыйнак кына үткәрделәр, төрле уеннар оештырдылар. Бу турыда җирле басма хәбәр итә.

Уеннарда катнашкан башка балаларны да бүләк биреп үсендерделәр. Бәйрәм барышында дистәләп кешене бүләк алырга дәштеләр: юбилярларны, яңа йорт салучыларны, “Авыл көнен” оештыручыларны, эштә уңганнарны.

Якты Тауга 1927 нче елда нигез салынган. Башта Иске Кадидан өч гаилә күченгән. Шулардан Вәлиәхмәт Билаловлар гаиләсендә туган Тәүфыйк – поселокта дөньяга килгән тәүге бала. Тәүфыйк Билалов озак еллар “Октябрьнең 50 еллыгы” колхозында рәис булып эшләде.

Монда йортлар саны 134 булган (бүген 75 тирәсе).1957 нче елдан авылда радио сөйли башлый, 1967 нче елда Сөләйман Сафиннар телевизор ала. 1953 елда клуб төзиләр; 1999 нчы елда өйләр газ челтәренә тоташтырыла.

Якты Тау бәйрәмен клуб мөдире Ләйсән Нотфуллина, китапханәчәе Әлфия Кәлимуллина, шулай ук Ислам Нотфуллин, Ренат Кәлимуллиннар оештырган. Авыл җирлеге башлыгы Илназ Мөхетдинов та бүләкләр алып килгән.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10