ҺАВА ТОРЫШЫ +10 oC

Яңалыклар

барлык хәбәрләр Татарстан Россия

Дин

Татарстан мөфтие дини йолалар турында нигезләмәгә багышланган дәресләрен башлады

18 август 2019, 17:31 , Фото: dumrt.ru

Татарстан мөфтие дини йолалар турында нигезләмәгә багышланган дәресләрен башлады Дәресләр һәр атнаның якшәмбе көнендә "Тынычлык" мәчетендә өйлә намазыннан соң була.

(Казан, 18 август, "Татар-информ"). Бүген Татарстан мөфтие Камил хәзрәт Сәмигуллин "Тынычлык" мәчетендә чираттагы дәресләр циклын башлап җибәрде. Бу турыда Диния нәзарәте матбугат хезмәте хәбәр итте.

Дәресләр “ТР мөселманнары Диния нәзарәте имам-хатыйблары тарафыннан гыйбадәт кылулар һәм дини йолалар үткәрү турында Нигезләмә”гә багышлана һәм йолаларны дөрес үткәрү, башкару тәртибе мәсьәләсендә күп бәхәсләр тудырган теге яки бу гыйбадәтләрне кылу турындагы сорауларга тәфсилләп аңлатмалар биреп бара.

Нигезләмә буенча дәресләр һәр атнаның якшәмбе көнендә "Тынычлык" мәчетендә өйлә намазыннан соң үткәреләчәк. 

"Нигезләмә" быелның җөмәдәл-әүвәл (гыйнвар) аенда ТР мөселманнары Диния Нәзарәте Пленум утырышында республика имам-мөхтәсибләре тарафыннан расланган иде. Документ барлык 48 мөхтәсибәт башлыклары мөфти Камил хәзрәт Сәмигуллин җитәкчелегендә, голәмәләр һәм казыйлар катнашында күмәкләшеп эшләнде.

Нигезләмәдә җомга намазларын, гает намазларын, мәетне озату, исем кушу йолаларын, ифтарлар уздыру, никах һәм талак тәртипләре һ.б. турында бүлекләр урын алган.

Имамнар һәм дин кардәшләребез арасындагы ислам гыйбадәтләренә кагылышлы барлык бәхәсләргә нокта куеп, ул Татарстанның һәр имамы өчен өстәл китабы буларак хезмәт итә һәм асылда татар халкында Хәнәфи мәзһәбе кыймәтләрен һәм йолаларын саклаучы механизм булып тора.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10