ҺАВА ТОРЫШЫ +5 oC

Яңалыклар

барлык хәбәрләр Татарстан Россия

Җәмгыять

Телевидение ветераны тапшыруларда фон музыкасын куллануда киңәшләрен җиткерде

16 август 2019, 19:56

Бүген Казан телестудиясенең алтмыш еллыгы уңаеннан тантаналы бәйрәм узды.

(Казан, 16 август, "Татар-информ", Зилә Мөбәрәкшина). Казан телевидениесендә 1961–1994 елларда монтажер булып эшләгән Сания Кудрявцева хәзерге тапшыруларда фон музыкаларын тәнкыйтьләде. Бу хакта ул “Татар-информ” хәбәрчесенә студиянең алтмыш еллыгы уңаеннан оештырылган тантаналы бәйрәмдә сөйләде.

“Фон музыкаларын дөрес куя белмиләр. Һәм тапшыруда сөйләүче кешенең тавышы шул музыка яңгырашы белән каплана, берни дә ишетелми. Алар чаманы аңламый. Төймәгә басалар да, музыканы бар тавышка акырталар һәм бетте. Беренче планда түбән регистрдагы бәрмә музыка ишетелә. Концертларда да шул ук хәл күзәтелә, җырчыларның тавышлары икенче планга кала, берни дә аңлашылмый”, - ди ул.

Сания ханым бәйрәмдә коллегаларын очраткач, сөенгәне турында сөйләде. “Алла боерса, быелның ноябрендә миңа 81 яшь тулачак. Кайсы гына фамилияне атамасыннар, барысы белән дә сокланам, бездә искиткеч кешеләр эшләде. Киноматериаллар белән эш иттем. Телевидение бөтен республикага бер иде. Телевидениене күзәтеп барам, бүгенге көндә ул иҗади яктан бик саеккан”, - диде ул.

  • Казан телевидение студиясе эфирга беренче мәртәбә 1959 елның 3 ноябрендә чыга. 1992 елда "Татарстан" дәүләт телерадиокомпаниясе оештырыла. 1990 елларда "ТРТ" каналы (Татарстан радиосы һәм телевидениесе) оеша, әмма 2000 елларда ул "Россия" каналына күчә. 2004 елның 24 декабрендә компания ДТРК филиалы була. Бүгенге көндә компания директоры — Фирдүс Гыймалтдинов.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10