ҺАВА ТОРЫШЫ +8 oC

Яңалыклар

барлык хәбәрләр Татарстан Россия

Фән һәм мәгариф

Казан укытучысы август киңәшмәсендә мөгаллим һөнәрен сайлау тарихын сөйләде

15 август 2019, 20:02 , Фото: архив/Салават Камалетдинов

Казан укытучысы август киңәшмәсендә мөгаллим һөнәрен сайлау тарихын сөйләде Республика август конференциясендә Наил Мирсәетов татар һәм инглиз телләрендә чыгыш ясады.

(Казан, 15 август, "Татар-информ", Гөлнар Гарифуллина). Казан шәһәре Мәскәү районы 2нче лицей-интернатның биология укытучысы, Казан шәһәре һәм Татарстанның ел укытучысы Наил Мирсәетов "Заман таләпләре һәм укытучыны үстерү драйверлары" темасына чыгыш ясады. Укытучы һөнәрен сайлау тарихын сөйләде.

Аның чыгышы татар һәм инглиз телләрендә булды. Ул укытучыны кешене тормышка әзерләүче һөнәр иясе булуын билгеләп узды. "Һәр төбәктә кеше ресурслары өчен көрәш мөһим мәсьәлә. Кеше капиталын җәлеп итүдә магнит ролен нәкъ менә мәгариф өлкәсе үти ала", - диде.

"Мәсәлән, мине Оренбург өлкәсе укучысын, Казанның сәләтле балалар өчен ачылган 2нче лицей-интернаты җәлеп итте. Монда мин төпле белем алдым, туган телемне өйрәндем, татар мохитенә кереп киттем", - диде Наил Мирсәетов. Аның сүзләренчә, бу белем аңа Россиянең иң яхшы педагогик университетларының берсе Мәскәү дәүләт педагогика университетына җиңел генә укырга керергә мөмкинлек биргән.

"Һөнәр сайлау мәсьәләсе авыр булмады - мин галимнәр нәселеннән. Мин Татарстанга кайттым, Мәскәүдә яхшы мөмкинлекләр булуына карамастан, Казанда яшәргә һәм эшләргә хәл иттем. Туган мәктәбемдә инглиз телендә укыта башладым", - диде Наил Мирсәетов.

Ул быел 2нче лицейның 292 укучысының 102се, ягъни һәр өченче укучы бөтенроссия олимпиадаларының республика этабы җиңүчеләре һәм призерлары булганын билгеләп үтте. 13 кеше Россия күләмендә җиңүче һәм призер булган.

"Мондый профильле лицейлар саны арта бара. Минтимер Шәймиевнең күп телле мәктәпләр ачу инициативасы да моңа ачык мисал булып тора. Бүген республикада яшь укытучыларның һөнәри үсеше өчен шартлар тудырылган. Аларга грантлар белән ярдәм итәләр", - диде Наил Мирсәетов һәм ТР Президенты Рөстәм Миңнехановка мәгариф өлкәсенә күрсәтелгән ярдәм өчен рәхмәтен җиткерде.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10