ҺАВА ТОРЫШЫ +8 oC

Яңалыклар

барлык хәбәрләр Татарстан Россия

Дин

Татарстан хаҗилары өстәмә гомрә кыла

15 август 2019, 10:02 , Фото: dumrt.ru

Татарстан хаҗилары өстәмә гомрә кыла Бәйрәм көннәрендә мәчеткә баручы автобуслар туктатылып торган иде. Гомумән, кайбер урамнар транспорт хәрәкәте өчен ябылды.

(Казан, 15 август,  "Татар-информ"). Бу көннәрдә Татарстан хаҗилары, Мәккәдә булган буш вакыттан һәм мөмкинлектән файдаланып, өстәмә гомрә кыла. Бу хакта Диния нәзарәте матбугат хезмәте хәбәр итте.

Хаҗ алдыннан гомрә кылганда хаҗилар Микат дип аталган урынга җиткәнче ихрамга кергән булсалар, хәзер Мәккә җирлегендә булган кешегә ихрамга керү тәртибе бераз башкача. Моның өчен хаҗилар кунакханәләрдә госел алып, чиста ихрамнарын киеп Гаишә анабыз (р.г.) мәчетенә бара, мәчеткә кереп гомрә кылырга ниятли, ике рәкәгать намаз укый һәм Әл-Хәрәм мәчетенә юнәлә.

Башка гамәл-гыйбадәтләр исә хаҗ алдыннан башкарылган гомрәдәге кебек үк: тәваф кылу (Кәгъбәтуллаһны 7 тапкыр әйләнеп чыгу), сәгый кылу (Сафа белән Мәрва таучыклары арасын 7 тапкыр үтү) һәм чәчне алдырып яисә кыскартып, ихрамнан чыгу.

Өстәмә гомрәне үтәргә хаҗилар төркем җитәкчеләре белән бармый, чөнки хәзер хаҗи-хаҗияләр әлеге йолаларны ничек башкарырга кирәклеген биш бармаклары кебек белә.

Моннан тыш, хаҗилар арасында Әл-Хәрәм мәчетенә тәваф кылырга, фарыз намазларны укырга йөрүчеләр дә күп.

Бәйрәм көннәрендә мәчеткә баручы автобуслар туктатылып торган иде. Гомумән, кайбер урамнар транспорт хәрәкәте өчен ябылды. Хәрәм мәчетенә җәяү яки такси белән барып булды.

Ә менә бүгенге төннән янә трансфер эшли башлады: хаҗилар хәзер иртәнге намазга да автобуслар белән планетабызның иң төп мәчетенә бара ала. Ә кемнәр намазны кунакханәләрдә укый – алар өчен дә сөенеч: намаздан соң ук төркем җитәкчеләре алып барган вәгазьләрдә катнашу мөмкинлеге бар.

Вәгазьләрне Ютазы районы мөхтәсибе Марат хәзрәт Мәрданшин һәм Лениногорск районы мөхтәсибе Исмәгыйль хәзрәт Сингатуллин алып бара. Дин әһелләре Пәйгамбәребезнең ﷺ күркәм әхлагы, әти-әнине хөрмәт итү һәм догада булу, кардәшлек хакы, күршелек әдәбе хакында нәсыйхәт сүзләрен җиткерә.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10