ҺАВА ТОРЫШЫ +18 oC

Яңалыклар

барлык хәбәрләр Татарстан Россия

Фән һәм мәгариф

Казан галимнәре атларны дәвалау өчен яңа препарат уйлап табуда катнашкан

13 август 2019, 15:12 , Фото: архив/Салават Камалетдинов

Казан галимнәре атларны дәвалау өчен яңа препарат уйлап табуда катнашкан Дару ике ай эчендә атларның аякларын тулысынча дәваларга сәләтле.

(Казан, 14 август, "Татар-информ"). КФУның Фундаменталь медицина һәм биология институтының ачык типтагы «Ген һәм күзәнәк технологияләре» лабораториясе белгечләре атларны дәвалау өчен нәтиҗәле ген препараты уйлап табуда катнашкан. Бу турыда ТР Фәннәр академиясе матбугат хезмәте хәбәр итте.

Даруны атларның зарарланган сеңерләренә кадаганда, ул ике ай эчендә аларның аякларын тулысынча дәваларга, үзләрен – аякка бастырырга сәләтле. Мондый травмалар хайваннарда һәм кешедә дә очраганга күрә, тикшеренү ветеринария өчен дә, шулай ук гомуми медицина өчен дә бик мөһим. Аның нәтиҗәләрен аяк-куллар белән бәйле башка төрле авыруларны дәвалау өчен дә кулланырга мөмкин, диелә бу хәбәрдә.

Ачышны Казан галимнәре Англиядәге Ноттингем университетының һәм Мәскәү дәүләт ветеринария медицинасы һәм биотехнологияләр академиясенең галимнәре белән бергәләп ясаган. Казан университеты ягыннан эксперименталь эшне КФУ профессоры, Татарстан Фәннәр академиясе мөхбир-әгъзасы Альберт Ризванов җитәкли. 

Фәнни тикшеренү вакытында препаратның тискәре йогынтысы булмау да ачыклана. Әлеге ачыш инглиз телле Daily Mail, The Telegraph, Science Daily, Alpha galileo ресурсы, USWeekly кебек басмаларда телгә алына, экспертлар тарафыннан югары бәяләнә.

Казан галимнәре бу дәвалану ысулын башка зарарлану очракларында, хәтта нәселдән килгән авыруларны терелтү өчен дә кулланырга була дип саныйлар. Мәсәлән, Казан зоопаркы һәм Казан ветеринария академиясе белән берлектә эт һәм мәче семьялыгыннан булган җәнлекләрне дәвалау вакытында ген препаратлары кулланыла. Казанда аларны сирәк очрый торган кыргый җәнлекләрне дәвалауда сынау да планлаштырылган.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10