ҺАВА ТОРЫШЫ +5 oC

Яңалыклар

барлык хәбәрләр Татарстан Россия

Мәдәният

Алабуга музеенда Халыкара арт-симпозиумда иҗат ителгән 70 картина тәкъдим ителде

24 июль 2019, 03:00 , Фото: Алабуга нуры

Алабуга музеенда Халыкара арт-симпозиумда иҗат ителгән 70 картина тәкъдим ителде Быел Алабугада тугыз илдән 35тән артык рәссам эшләгән.

(Алабуга, 24 июль, "Татар-информ", "Алабуга нуры"). Узган атнада Алабуга дәүләт музей-ядкарьлегенең Күргәзмәләр залында заманча сәнгать буенча XIV Халыкара арт-симпозиум вакытында иҗат ителгән 70 картина тәкъдим ителде. Бу турыда җирле басма хәбәр итә.

Быел Алабугада тугыз илдән 35тән артык рәссам эшләгән. Иң яшь катнашучыга – 29, ә иң тәҗрибәлесенә – 80 яшь. Аларның иҗади остаханәләре И. И. Шишкин исемендәге 1нче сәнгать мәктәбендә урнашкан. Рәсем сәнгате осталарының эшләре һәр гаилә тормышында үзенчәлекле вакыйгага – туйга багышланган иде. 

Менә безнең районның фольклор коллективлары да күргәзмә ачылыр алдыннан симпозиумда катнашучыларны рус, мари, керәшеннәрнең туй йолалары белән таныштырдылар. Рәссамнар аларны зур кызыксыну белән күзәтте һәм биюләрдә бик теләп катнашты.

– XIV Халыкара арт-симпозиум безнең чакыруны хуплавыгызга күрә оешты, – дип мөрәҗәгать итте Алабуга дәүләт музей-ядкарьлегенең генераль директоры Гөлзада Руденко. – Без сезнең белән тынычлык, бер-беребезгә мәхәббәт, халыклар арасында дуслык һәм берләшү булсын, планетабыз матурлансын өчен бер зур эш башкарабыз.

Сүз уңаеннан, арт-симпозиум вакытында иҗат ителгән барлык картиналар Алабуга музей-ядкарьлеге фондларына күчте, һәм киләчәктә Россиядә һәм чит илләрдә булачаклар. Әлегә алабугалыларның 30 сентябрьгә кадәр эшли торган күргәзмәне күреп хозурлану мөмкинлеге бар.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10