ҺАВА ТОРЫШЫ +16 oC

Яңалыклар

барлык хәбәрләр Татарстан Россия

Җәмгыять

Иван Егоров: Без быел Тырлау аланында Питрауның өченче дистәсенә юл ачабыз

21 июль 2019, 16:07 , Фото: Рамиль Гали

Иван Егоров: Без быел Тырлау аланында Питрауның өченче дистәсенә юл ачабыз Фестивальнең төп оештыручысы кичә Мамадышта XX республикакүләм “Питрау” керәшен мәдәнияте фестивалендә чыгыш ясады.

(Казан, 21 июль, “Татар-информ”, Динә Йосыпова). “Без быел Тырлау аланында Питрауның өченче дистәсенә юл ачабыз”, - дип белдерде “Питрау” фестиваленең төп оештыручысы, Республика керәшеннәренең иҗтимагый оешмасы идарәсе җитәкчесе Иван Егоров “Питрау” керәшен мәдәнияте фестивален ачу тантанасында.

“Быел фестивалебезнең 20 еллык юбилеен билгеләп үтәбез. Бу еллар эчендә бәйрәмебезнең нинди зур чара булып үсеп җитүе барыгызның да күз алдында. Кечкенә генә авыл бәйрәменнән без Республика керәшен культурасы фестивале статусына күтәрелдек. Татарстаннан гына түгел, читтәге регионнардан да кунаклар кабул итәбез. Россиядә таралып яшәгән карендәшләребезне без йодрыкка берләштереп, бергә җыябыз”, - диде.

Иван Егоров егерме ел эчендә бәйрәм мәшәкатьләрен үз җилкәләрендә күтәргән авылдашларына, райондашларына, Мамадыш администрациясенә, төрле оешма җитәкчеләренә зур рәхмәтен җиткерде. “Республика керәшен оешмасы төзелгәннән соң, Питрау да яңарыш кичерде. Шушы елларда эшләнгән эшләр барысы да ярылып ята, барысы да бәйрәмебезнең бизәге, мәйдан күрке”, - диде ул.

Иван Егоров традицияләрне саклаучы өлкәннәргә, балалар, яшьләр белән эшләүче укытучыларга, тәрбиячеләргә, халкыбызны саклап калуда хезмәт куйган активистларга, ветераннарга рәхмәтен белдерде. “Бүгенге зур бәйрәм – безнең барыбызның да күп еллар буена куйган хезмәт нәтиҗәсе. Без быел Тырлау аланында Питрауның өченче дистәсенә юл ачабыз. Фестивалебез гомерле булсын!” – диде ул.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10