ҺАВА ТОРЫШЫ +23 oC

Яңалыклар

барлык хәбәрләр Татарстан Россия

Җәмгыять

Табиб: Балаларга ял алдыннан пневмококктан прививка ясату хәерле

15 июль 2019, 18:40 , Фото: minzdrav.tatarstan.ru

Табиб: Балаларга ял алдыннан пневмококктан прививка ясату хәерле Лилия Зыятдинова прививканың отит, синусит, бронхит, үпкәләр ялкынсынуын кузгатучы төп бактерия – пневмококктан саклавын әйтте.

(Казан, 15 июль, “Татар-информ”, Гөлнар Гарифуллина). Балага илкүләм календарьга кергән прививкалар ясалмаган очракта, чит илгә ялга барганчы пневмококк бактериясенә каршы прививка ясату хәерлерәк. Республика балалар клиник хастаханәсенең изоляцион-диагностика бүлеге мөдире, югары категория педиатр Лилия Зыятдинова ТР Сәламәтлек саклау министрлыгында матбугат конференциясендә шулай дип белдерде.

“Ниндидер сәбәпләр аркасында балагызга кечкенәдән прививкалар ясатылмыйча гаилә белән курортка барырга җыенасыз икән, пневмококк бактериясенә каршы прививка ясату кирәк. Отит, синусит, бронхит, үпкәләр ялкынсынуын кузгатучы төп бактерия – пневмококк”, - диде ул.

Ул, шулай ук, балаларда гемофиль инфекция дә киң таралганын билгеләп узды. “Балалар диңгезгә барганда отит еш була. Шуңа күрә бер ай алдан шушы кузгаткычлардан прививка ясату хәерлерәк”, - дип кисәтте Лилия Зыятдинова.

Ул бөтенләй прививкасыз балаларның авыру куркынычы зуррак булуын билгеләп узды. “Бала ял урынына барып җиткәнче үк, самолетта, паспорт контролендә кешеләр белән контактка керә. Ял итәргә килеп җиткәч кенә, бала температурасы күтәрелеп, ангина, гайморит, отит белән авырый башларга мөмкин”, - дип кисәтте Лилия Зыятдинова.

ТР Сәламәтлек саклау министрлыгының йогышлы авырулар буенча баш белгече Халит Хаертынов сары бизгәге, менингокок инфекциясе таралу ихтималы зур булган илләргә барырга җыенган һәркемгә прививка ясату кирәклеген әйтте. Антитәнчекләр ясалсын өчен аны сәяхәт алдыннан ике атна яки бер ай алдан ясату мөһим.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10