ҺАВА ТОРЫШЫ -11 oC

Яңалыклар

барлык хәбәрләр Татарстан Россия

Дин

Камил Сәмигуллин динара низаглар турында: Татарстанда бу коткыга бирелмәделәр

4 июнь 2019, 08:34 , Фото: архив/Рамиль Гали

Камил Сәмигуллин динара низаглар турында: Татарстанда бу коткыга бирелмәделәр "Татарстан үрнәк, без моны аңлап яшибез", - диде ул.

(Казан, 4 июнь, "Татар-информ", Алсу Исмәгыйлева). Татарстан Республикасы мөфтие Камил хәзрәт Сәмигуллин бүген Ураза гаете уңаеннан Казанның Галиев мәчетендә узган бәйрәм вәгазе вакытында республикада күпмилләтле шартларда динара мөнәсәбәтләрнең уңай хәл ителүен искәртте. "Татарстан үрнәк, без моны аңлап яшибез", - диде ул.

Шул ук вакытта мөфти дөньяда динара низагларның булып торуын әйтте. "Ни кызганыч, үзләренең наданлыклары һәм культурасызлыклары аркасында дин тотучыларга карата тупаслык һәм хөрмәтсезлек күрсәтүчеләр, нәфрәт утларын чәчәргә омтылучылар бар. Алар татулыкның әһәмиятен аңламыйлар", - диде ул.

Бу уңайдан мөфти күптән түгел Калининградта булган хәлне искә алды: быел май аенда өлкәдәге бер бистәдә суд карары белән кечкенә мәчет сүтелде. Шулай ук мөфти Татарстан мәктәпләрендә мөселман гаиләләрендә тәрбияләнгән балаларның исемлекләрен төзергә омтылуларын да искә төшерде. "Мондый хәлләрне күзәтү бик күңелсез", - диде ул.

Мөфти Татарстанда мондый хәлләрнең татулык белән чишелгәнен әйтте. "Безнең республикабызда бу коткыга бирелмәделәр, үзара хәл итә алдык, ямьсез сүзләр әйтешмәдек", - диде Камил Сәмигуллин. Ул хәзерге вакытта Татарстанда дин тоту өчен уңай шартлар булуын әйтте. Мәчетләр төзелә, хәләл кафелар бар. Мондый заманнар элек булмаган. Ышанмасагыз, бабаларыбыздан сорагыз”, - диде ул.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10