ҺАВА ТОРЫШЫ +12 oC

Яңалыклар

барлык хәбәрләр Татарстан Россия

Җәмгыять

КФУ галиме яшен сугудан саклану өчен киңәшләр бирде

31 май 2019, 10:45 , Фото: pixabay.com

КФУ галиме яшен сугудан саклану өчен киңәшләр бирде Морат Таһиров яшенле яңгыр вакытында кәрәзле телефоннан сөйләшү куркыныч икәнлеге турындагы мифның ялган булуын искәртте.

(Казан, 31 май, «Татар-информ»). Казан федераль университеты Физика институтының квант электроникасы һәм радиоспектроскопия кафедрасы мөдире, профессор Морат Таһиров Татарстан халкына яшен сугудан саклану буенча кайбер киңәшләр бирде. Бу хакта югары уку йортының матбугат хезмәте хәбәр итә.

Профессор искәрткәнчә, яшен техника түгел, ә кеше өчен зур куркыныч тудыра. Кан һәм лимфа составында тоз булу сәбәпле, кеше электр тогын үткәрүче санала.

Морат Таһиров яшенле яңгыр вакытында кәрәзле телефоннан сөйләшү куркыныч икәнлеге турындагы мифның ялган булуын искәртте. «Телефон электромагнит дулкыннарны тота, шунлыктан аны файдаланырга мөмкин», - дип искәртте ул. Һәм телефоннан сөйләшеп вакыт әрәм итмичә, тизрәк ышыкланыр урын эзләргә киңәш итте.

Шул ук вакытта, галим биек объектлар һәм әйберләр, ялгыз агачлар янында басып торуның куркыныч булуына, аларны еш кына яшен сугуына игътибар юнәлтте.

Әгәр яшенле яңгыр вакытында урамда түгел, өйдә булсагыз, электр приборларын сүндерергә, шулай ук шарсыман яшен бүлмәгә очып кермәсен өчен, тәрәзәләрне яхшылап ябарга кирәк. КФУ профессоры Җирдә һәр секунд саен якынча 100 яшен сугуын һәм яшеннең әле күптән түгел генә ачылган үзенчәлекле төрләре (джетлар, спрайтлар, эльфлар) турында искәртте.

  • «Татар-информ» агентлыгы моңа кадәр хәбәр иткәнчә, иртәгә, 1 июньдә, атмосфера фронтлары Татарстанга яшенле яңгырлар алып киләчәк. Шулай ук җилнең тизлеге көчәер һәм боз явар дип көтелә.

 

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10