ҺАВА ТОРЫШЫ +9 oC

Яңалыклар

барлык хәбәрләр Татарстан Россия

Җәмгыять, Дин

Казанның Җәмигъ мәчетендә музей, конференц-зал һәм мәдрәсә булыр дип ниятләнә

18 май 2019, 14:01 , Фото: архив/Рамиль Гали

Казанның Җәмигъ мәчетендә музей, конференц-зал һәм мәдрәсә булыр дип ниятләнә Шәһәрнең үзәк мәчете проектының эскиз җыелмалары булдырылган.

(Казан, 18 май, “Татар-информ”, Марат Ишкилдин). Казанның Җәмигъ мәчетендә музей, конференц-зал, мәдрәсә яки сәүдә мәйданчыгы төзелергә мөмкин. Бу хакта “Татар-информ” мәгълүмат агентлыгы хәбәрчесенәТатарстан мөфтие Камил хәзрәт Сәмигуллин сөйләде.

“Мәчет төзелеше өчен мәйданчык инде сайлап алына, әмма иң мөһиме - аның урыны ызгыш урыны булмау. Ул түрәләр яки хәзрәт мәчете түгел, ә халык мәчете булачак”, – диде Камил хәзрәт Сәмигуллин.

Мәчет проекты буенча җәмәгатьчелек белән фикер алышу планлаштырыла. Әлегә башка мәчетләрнең проектлары өйрәнелә. Мәсәлән, Төркиянең иң зур “Чамлыджа” мәчете (63 меңгә кадәр кеше сыя). Мондый тикшеренүләр ярдәмендә проектлаучылар Казанның Җәмигъ мәчетендә нәрсәләрне гамәлгә ашырырга мөмкин булачагын билгели.

“Бәлки анда музей, конференц-зал, мәдрәсә яки сәүдә мәйданчыклары барлыкка килер. Әгәр мәчет елга янында төзеләчәк икән, анда җир асты парковкасы кирәк булачак”, - диде Татарстан мөфтие.

Хәзер иң беренче мәсьәлә - җир урыны сайлау. Шуннан соң проект әзерләү җиңелрәк булачак. Камил хәзрәт сүзләренә караганда, проектлаучылар проблемага ныклап якын киләләр, чөнки мөселман гыйбадәтханәсенең кирәклеген аңлыйлар.

“Минемчә, мәчет Татарстан башкаласы кунаклары Казанның иң төп мәчете – энҗе бөртеген күрә алсын өчен җайлы урында төзелгән булырга тиеш. Ягъни шәһәр үзәгеннән күренеп торырга тиеш”, - диде Камил Сәмигуллин.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10